image
image
 




Ole lauga ile suafa mamalu ole Atua le Tama le Alo male Agaga Paia amene.



Tusi Faitau: : 1 korinito 9: 19- 23.

Matua:

Ua avea au ma mea uma mo tagata uma, ina ia iu lava ina ola nisi ia te au. 23, oute faia foi le mea nei, ona ole talalelei, ina ia ou auai i ona faamanuiaga "

Autu:

Mole faamoemoe ole talalelei.
E faia e Paulo nei mea uma - ona ole talalelei. Ua peiseai ole sifi le talalelei, oloo faatonu isi aposetolo, fai le mea lena, poo lea lava le auala e te mafai ona fai ai, fai. Sulu iai male ulu Paulo, o lou ala lena i malo.
Manatu Paulo leai lava la seisi mea e sola iai.
Ole faatonuga lea ua tuu mai; a faapefea le olioli lale oloo I luma.
F23, Oute faia foi le mea nei, ona ole talalelei, ina ia ou auai ile faamoemoe ole faamanuiaga ole ola atali.

Tomuaga:

faamoemoe ose moomooga o loo i luma, e lei vaaia, e lei oo foi iai, e lei faataunuuina.
Upu ole tusi, ose faamoemoe e vaaia, e le ose faamoemoe.
E mafua ona iai le talalelei, ona ole faamoemoe lea e fai mai Paulo f 23, ole faamanuiga ile iuga.
E pei lava ona malamalama, e mafua ona aoga ona ole faamoemoe ia ausia le le poto - le faauuga ile tikeli.. O lona uiga ole aoga, ole auala lea e uia, ina ia maua ai le tikeli. Tele auala ua avanoa e sailia ai le tikeli.
Le tausaga na tea nei, ile maota o tupulaga, na faauu ai tama ma teine io latou faailoga na ausia ao ile USP.
Le faailoga la ole loia, Ole toatele ole au faauu, na aooga i Vanuatu ma maua ai le tikeli, ao Maiava Iulai Toma, na aoga atu lava oia i Apia, faaaogaina ai le Internet ma maua ai le tikeli ole loia. Ole tasi lea o faamaoniga, e le tasi se auala, e ausia ai le faamoemoe, lea ole tikeli.
Lelei le internet, lelei foi le alu i Vanuatu. O auala lelei nei male talafeagai mole ausia ole faamoemoe.

Ole faamoemoe- ole tagata fia Ola, ole manuia atali.
O le auala e uia e le tagata fiaola- ole ola ile talalelei.
Fai mai le Alii, ele alu atu lava se tasi ile Tama pe a le uia atu ia te ia. Ole Alii ole faavae ole talalelei, ole talalelei ole auala lea ile manuia ua folafola mai. Ile amataga ole galuega ole talalelei, oloo iai le tagata fiaola. Ile faaiuga ole talalelei, oloo iai tagata manuia atali.
Ao le va ole fiaola- male manuia- oloo ogatotonu ai le talalelei.
Tagata fiaola - talalelei- tagata manuia.
Ole taumafai ai ale aposetolo, ina ia maua le faamoemoe manuia; ole auala la ile manuia ole - ole aoaoina ile talalelei.
E malamalama ai loa, ona fiafia lea e galue mole manuia ile iuga.
O faiupu na faitauina, oloo tau mai ai le faaaogaina e Paulo o auala eseese ole talaiga ole talalelei. Na avea ai oia ma ituaiga tagata eseese, ina ia maua le tagata fiaola, mole talalelei.
Faataigaiga; faiupu e 19, Aua e ui ina ou saoloto mai tagata uma, ua faapologaina au e au mo tagata uma, ina ia atili ai ona tetele oute maua.
O lona uiga, ose tasi lea o auala na faaaogaina e Paulo, mole talaina ai le tala lelei. Silafia e Paulo le lagona ole pologa, ona avea ai lea o oia e pei ose pologa, ina ia mafai ona mafuta atu i le pologa.
A fia maua mai tagata matitiva mole manuia ole Alii, e sili le avea ma mativa ina ia malamalama ile mativa.
Ile tino, e ola ose tagata mativa, e amio ose mativa, e ai ose mativa. Ole auala lea e faigofie ai fesootaiga, ma tuu atu iai le tala lelei ile mativa.
Faimai ana upu,
Sa avea o ia ma Iutaia ina ia maua mai iutaia.
O lona tulaga faresaio, ose fesoasoani tele i lana galuega mole tala lelei, aua na faigofie ona taliaina e Iutaia, aoaoga mai le faresaio o Paulo.
O lona poto ile tulafono, sa ia mafai ai ona fetuunai ile tulafono a Mose, ma poloaiga na auala mai le Keriso.
Iai le au Iutaia mapo tulafono, ua aoao iai Paulo ina ia faatuatua ile Keriso, aua o Paulo oloo ola ile tulafono a Keriso.
Sa avea Paulo ma vaivai, ina ia maua le au vaivai.
O ai lava le le taualoa ma le faatauvaa ile vaai a tagata, na lei vaai maualalo iai le aposetolo, peitai ia mafuta iai, ma avea ai oia e pei ose tasi oi latou, ma faigofie ai ona taitai i latou ile talalelei.
O auala uma nei na uia e le aposetolo, na avea ai oia ma ituaiga o tagata eseese, mole faamoemoe ole talalelei.
O ana upu,
f,22, Ua avea oIa ma mea uma mo tagata uma, ina ia ola ai nisi.
Le nuu e ole Atua,
Mole faamoemoe ole talalelei, [For the sake of the gospel] lea ua faimai Paulo, ole talalelei, ole auala oloo iai tatou ile ola nei, e le ose laasaga e faatalitali iai, ise isi taimi.
E le ose mea e pau mai le lagi, ole talalelei, ole auala ua faailoa mai, a tatou filifili e soifua ai, ona maua lea ole manuia, amata atu nei seia tau ile - faamoemoe atali.
Ole valaau, ina ia tagai ane i autafa, pe faapefea ona faaaoga lo tatou ola mole talalelei.
Upu ale aposetolo, [19], ua faapologaina eIa oIa, ina ia atili ai ona toatele nisi nate maua. Ua avea oia ma mea uma.
Ole talalelei, ole auala lea ua tuu mai e le Alii, tatou galulue ai, ina ia ola fiafia tagata. O ala e talafeagai mole talalelei, o ala e maua ai le viiga ole Atua. Ala ele solia ai le tulafono, ala e galulue faatasi ai ile fealofani, ma maopopo ai le nuu. Ole manatua o Paulo- a faia se galuega, ia faia e tusa oloo faia ile Atua. E le faigofie ile tagata e faalagolago i lona malosi ma sona atamai.
Ole faigaluega faamaoni mole talalelei, e lagona le valaau,
Le auauna lelei e male faamaoni i mea iti, ulufale mai ile fiafia ole Alii.
Ina ia toe avatu le tagata ale Atua ile mafutaga e faavavau, na faaaoga ai e le Atua le auala ole liutino tagata.

O Keriso Iesu, o le sa uiga faatasi ma le Atua, a ua sasaa mai e ia oia lava, e fai ma ona uiga le pologa, ina ua fanau mai e pei ose tagata, ua faamaulalo oia e ia oia lava, ua na anaana ua oo ina maliu, ole maliu lava lea ile satauro..
Auala uma nei na uia ele keriso, ona ole alofa o le Atua.

Amene



Rev Avea Talitonu Saleimoa Samoa.

O loo faaopopo pea mataupu fou , ole mea lea faailoa mai ni mataupu oloo fia silafia tatou te fetufaai ai.

We are conntinually adding new material and new topics. Please check back frequently in regard to obtaining information that is of interest to you.


Revision: 2.991.00

Date: Sun Apr 02-04-2006


 




image
image
image
 
image
image