image
image
 




Ole lauga ile suafa mamalu ole Atua le Tama le Alo male Agaga Paia amene.



Tusi Faitau: Ioelu 2:28- 32. Galuega 2: 1- 4

Matua:

“Galuega 2: 2, 3.
Ona faafuase’i mai lea ole taalili mai le lagi, peiseai ole matagi ua agi tele mai, ua tumu ai le fale sa latou nonofo ai, ua iloa foi e i latou o laulaufaiva peiseai ole afi ua vaevaeina, ua nofo i o latou luga taitoatasi.”


Autu: ole vaiaso: o foliga ole agaga.

Autu ole aso: ole matagi male afi.

Tomuaga:


E fesilisili lava le mafaufau, pe aisea ua faaaoga ai le matagi male afi e auala mai ai le agaga paia.

O le malosi o matagi e amata mai lava ile sau agimalu, e oo lava i le malosi- e faaleaga ai le vaomatua, fale tetele, ma soo se mea e tau atu iai.

Na ona o tatou lagona lona agi mai, ma vaaia lona aafiaga, ae le iloa lona tino mai.

O le afi e iai lona aasa e kuka ai meaai, ma susunu ai le otaota.

Taatia ia uiga malolosi o le matagi ma le afi, lea e aafia ai le saogalemu ole tagata, ao uiga ole o le afi male matagi e fia talanoa iai; ole faaleleia i le siosiomaga, uiga matagofie lea o elemeni nei e lua, tatou te fia faaaogaina ai le matagi male afi, e auala mai ai le Agaga Paia.

Ole Agaga Paia e faalelei ile Ola.

Ole agimalu mai ole matagi, nate toto i tino, lagona ole ola faafouina.

Ole pa’i mai ole mafanafana ole afi, nate faasolo lelei le tafe ole toto ile tino, lagona ai foi le malosi faafouina. Na ole fia taotooto ai ma mafaufau pea i uiga ole Ola.

E le gata i lea ole isi uiga ole matagi e fia fia faataua, o lona tuputupu mai ise savili malu, ma faasolosolo ina agi malosi, ma taavili lava ma faaasolo ile avea ma afa. Faapea foi le afi, e amata mai le aloi afi ma faasolo ina avea ma afi tele ma salalau atu ile vaomatua.

O faatupulaia o le matagi male afi, e faatusa iai le tuputupu a’e ole tala lelei, mai lona amataga i Ierusalema faasolo ane I Iutaia uma, Samaria, ma oo ile malo o Roma, aferika, europa seia oo mai lava i Samoa male lalolagi atoa. O lona oo ane i nuu ma atunuu fou, na susunu ina ai le faapaupau, faaamamaina e faamalamalama ile tala lelei ia Iesu Keriso.

Lea ua faaaoga e Luka le matagi male afi e faailoa mai ai le afio mai ole agaga paia i tagata oloo faatalitali iai.

Ole tala a Luka ile aso penetekoso faapitoa lea, ao potopoto soo ole Alii ise nofoaga, tumu lava i latou ile le mautonu, masalosalo ma le faanoanoa; aua - ua latou matuinoa le afio ese ile lagi, o lo latou taitai; oloo ise laasaga ua tauau ina leai se faamoemoe, ae faate’ia loa le mafutaga ise:

[ Faiupu 2, 3.] “Taalili mai le lagi; peiseai ole matagi ua agi tele mai, ua tumu uma ai le fale sa latou nonofo ai. Ua iloa foi e latou o laulaufaiva,

peiseai- ole afi ua vaevaeina, ua nofo i o latou luga taitoatasi”.

Ole matagi lava na agi taalili mai le lagi. Ana ose faititili e ta’u mai foi se emo ole uila. Ao le matagi lava na agi taalili mai le lagi, ae leiloa atu; ae ina ua oo i totonu ole fale, na suia le matagi - i mea foliga o laulaufaiva –afi, ua nofo i luga oi latou uma na iai ile fale. Ua faatusa le vaaiga uiga ese lenei, i laulaufaiva, ona e foliga i laulaufaiva, laititi foi pei ole laulaufaiva, ae foliga foi ile afi mumuitiiti lava, ua tofu ai le tagata mulimuli - pea ile Alii.

Mautinoa na o tagata na fiafia lava e mulimuli ile Alii, tagata na talitonu ia Iesu, na i ona luga laulaufaiva afi. Ua le taua se manu mea mu o totonu ole fale, e faamautinoa ai le afi e pei ona tatou iloa ma masani ai, se manu e ta’u mai foi e Luka.

Ua faamatala mai lava e le tusitala, ole afio ifo ole Agaga Paia, na auala mai i elemeni foliga -ole matagi male afi. Ole faailoga ole tapulaa ole gagana a tatou i mea ole tino nei, e le lava upu ma mea ole tino, e faamatalaina ai Le Atua ma le lililo olona silisili ese.

Ui i lea, ole taimi lava na aafia ai i latou i laulaufaiva afi nei, le taimi foi lea na lagona ai e le mafutaga, se suiga - ole ola ma le malosi.

E le gata ilea, ua tautatala tagata i gagana eseese.

Peitai e gagana ane faapea i latou, ae tauemu le nuu na i autafa, ma faapea ane, ua ona le mafutaga ile uaina. Vave ia ona fai o faaiuga, e aunoa male saili ole moni.

Ose uiga - e vave ai lava ona oo mai, ia i tatou le maasiasi .

Le faatauemu lea na tali ane iai Peteru,

Ma ta’u iai, ole malosi ese lea ua lagona ele mafutaga, ole agaga paia.

Le agaga lea na valoia ele perofeta o Ioelu, 2: 28,

“Mulimuli ane oute liligi ifo ai lou agaga i luga i tagata uma, ona perofeta ai lea o outou atalii, e fai miti outou toeina, e iloa faaliga e outou taulelea.”

Ole agaga paia ole meaalofa mai le Atua, lea na folafola e le perofeta o Ioelu; le Agaga Paia foi lea na folafola e Iesu i ona soo, pea afio oia ile lagi, ole a auina ifo le agaga paia e fesoasoani ile au faatuatua. Lea la ua oo ile taimi e tatau ai, ua afio ifo le agaga paia, ua faatutumuina ai latou na potopoto. Ole mana ole agaga paia, ua mafai ai ona latou molimau atu le tala ia Iesu Keriso ile lalolalgi. O le amataga lea ole ekalesia; ma ua amata ona mafaufau Soo ile faasalalauina ole tala lelei ile lalolagi.

Ole mana ole agaga paia:

Ua faailoa mai- ole agaga paia, ole fesoasoani, ae faatoa fesoasosani lava pe a o tatou valaau ile Agaga Paia. E le fia pule le Agaga Paia ia i tatou. Ua uma ona aumai le aia ile tagata e filifili ai. Seiloga lava la ua o tatou valaau ile agaga paia e fesoasoani mai, ona auai lea.

E le gata i lea, o ala o galuega, tatou te le faamoemoe e faia uma e le agaga paia le galuega mo tatou, e iai la tatou pitolaau e faatino, ona fesoasoani mai lea o le Agaga Paia. Ole tamaititi e fia maua le poto, ae le toaga e suesue, e faigata ona maua le poto. Poo lea foi le toaga e tatalo, e faigata lava ona maua. Taimi uma lava e tatalo ai, ole tali lava, toaga e suesue, toaga e galue, ona faa-faigofie lea, e le Agaga Paia, o le ala ile poto.

Fetalai foi le Alii, ia tatou suesue ona o tatou maua lea.

Ae le na ole; le Alii e, le Alii e, ae le faia se galuega.



O le isi fesoasoani ale Agaga Paia mo tatou.

Ioane 16:8 Pe a afio mai le Agaga Paia, nate faailoa ile lalolagi, le agasala, male amiotonu, male faamasinoga.

O lona uiga, faapea lava le lalolagi oloo sa’o taiala oloo soifua ai. Tali pei ole ifo i tupua, ma le tele uiga faapaupau sa soifua ai tagata, e manatu lava oloo sa’o lava latou, ae maise pe a o sologa lelei lava le ola ile tele ole tamaoaiga, leai se mea e mativa ai, maua ai le malosi male fiafia.

Ole avanoa lea e fesoaosani ai le Agaga Paia ile au tala’I ole tala lelei. Ao faasoa atu le tala lelei ole faaolataga na faia e Iesu Keriso, ole mana ole Agaga Paia, nate faia vavega i loto ole au faalogologo. Le mafuaaga lea e faalologo ai ile tala ole ola, tei lava ua vaaia ua tulolo ifo ma faapea ifo, e moni lava ole alo ole Atua lena tagata. E lagona le tagata agasala, ma salamo loa ma talia le tala ole faaolatagaga. Ole mana ole Agaga Paia, na vave ai le salalau, ole ekalesia mai Ierusalema agai ile lalolagi. Ona ua tofu le tagata talai ma lona fesoasoani.



Taimi tatou te fefefe ai, ma leai se tonu mautu; ole Agaga Paia, nate faamalosi mai. Taimi tatou te masalosalo ai, poo sao ea lenei tautua lotu, o le agaga paia nate faafou mai. Le taimi e nunumi ai ma vevesi uma, ua na ole fia taui ma sui atu, ole agaga paia nate faatumu i tatou i le alofa, le olioli male filemu.

O tatou ole tino o Keriso, ole au talai ole tala lelei, ua valaauina e ta’uta’u atu, le tala ole faaolataga. O le faailoa atu lea, e agasala tatou uma. Tatou te manaomia le faamagaloina, ae ua na o Iesu Keriso e magalo ai tatou. Le mafuaaga lea – [stress]- e tatau ai le faatuatua ile Alii.

Fetalai mai le Alii, Ioane 16: 9, ole agasala, aua ua le faatuatua ia te Ia.

Ole folafolaga ale Alii, nate le tuulafoaina tatou, e ia te tatou i aso uma,

e oo i le gataaga ole lalolagi. O lona uiga ole Agaga Paia, e faatasi mai pea ia I tatou, e maua ai lo tatou malosi, e tala’i ai le galuega ole faaolataga.

Le faamanatuga lea ole faaolataga na faia e Iesu Keriso mole faamagaloina o a tatou agasala.

Amene.










Rev Avea Talitonu Saleimoa Samoa.

O loo faaopopo pea mataupu fou , ole mea lea faailoa mai ni mataupu oloo fia silafia tatou te fetufaai ai.

We are conntinually adding new material and new topics. Please check back frequently in regard to obtaining information that is of interest to you.


Revision: 2.1971.00

Date: Sat May 06-05-2006


 




image
image
image
 
image
image