image
image
 




Ole lauga ile suafa mamalu ole Atua le Tama le Alo male Agaga Paia amene.



Tusi Faitau: Iosua 17: 12- 18, 18: 1- 6. Mareko 5: 25-34.

Matua:

Iosua 1: 12, A ua le mafai ele fanau a Manase ona tutuli i tagata o ia aai, a ua finau sa Kanana e nonofo pea i lena nuu.

Autu: ole fatuatua e foia ai faafitauli.

Ile mafaufau male talitonuga ole Isaraelu,

O tagata sa Kanana, o tagata faapaupau. A tau loa tagata sa Kanana, o tagata ifo I tupua, e tupuga mai ai faafitauli, ma e tatau le tafiese, ae tuu na o le tagata ole Atua ile nuu ole folafolaga.

Tomuaga:



Ole faafitauli muamua:

[1] O Sa Kanana na faigata ona faatoilalo ile amataga.

Le vaega lea na oo ina faatoilaloina, peitai sa latou faasao, ma faaaoga i latou; ma a latou auauna. Le vaega lenei, na tupuga ae ai le tele o faafitauli, aua na oo lava ina o latou fai-ava ma nofo tane iai, ma toe olaola ae ai le toto faapaupau ile nuu.

Ese taiala ale faapaupau, ese tulafono tausi ale Isaraelu. Faataitaiga, e tausi le sapati a le Isaraelu, ao le faapaupau e le popole ile aso sapati. A le tausi la, le sapati e le kanana faapaupau, e afaina ai le tapuaiga a le Isaraelu. Tali tutusa lava ma lo tatou gasolo mai ile lotu ma ofu papae, ae gasolo le isi vaega ile matafaga ile Aso Sa. Tatou te fesilisili ifo ai, poo sao ea lea mea o fai, ae maise ole ituaiga papae le la, na omai male tala lelei i o tatou matafaga.--Ae sala fiafia la le palagi ile matafaga, aua e le nofo ile matafaga, ao le mulimuli atu ai ma le Samoa, o lea e nofo ile matafaga i aso uma, talofa e ise fia palagi, fai atu ai foi. Oloo ia tatou le saolotoga, i aso e ono, ao le aso e tasi mo le tapuaiga ile Atua, ae le faatauaina, ole faailoga ua faaletonu le mafaufau. O le iai o talitonuga eseese i totonu ose faapotopotoga o tagata, e tele ni faafitauli e puna mai ai. Faafitauli nei, ua na - Ole faatuatua e foia ai.

[2] lona lua o faafitauli- o le vaevaeina o eleele.

Ua maea ona faamautu eleele o isi aiga, ae toe nei o aiga e fitu e fia faamautu o latou tofi. Ao lea ua lagona le leo ole le fiafia ole aiga o Manase, o lo latou aiga - ose aiga toatele, ae le lava le fasi fanua e tasi mo latou; ao le tele foi ole eleele, e mauga ma mafiafia ile vaomatua.

E le gata i lea, ae ua latou fetaiai ma Kanana i fanua laugatasi, oni tagata totoa, e iai a latou kariota uamea ma solofaua, oni tagata foliga saua tele, male faafefe ane.

Tali a le taitai o Iosua, toatele lo outou aiga, tele eleele o loo outou vaai atu iai, amata mai le sami, oo ile vaomatua, seia oo i luga o mauga.

O faatoilalo, faatoa ma atiae ai, o lou tofi lena.

e te mafai ona tulia ese latou.

O le faatonuga e sau ma le mana o le ona le faatonuga.

Ole lapatai mai, ia faamalosi aua le faavaivai, faalagolago tasi ile Atua, ole faatuatua e foia ai faafitauli.E tofu uma tatou ma faafitauli. O faigata ona faaaoga tamaiti?

O e oi i mea faale nuu? ae a mea faale lotu? O faasala soo oe e matai? Ma nisi o faafitauli.

E tupu loa le faatuatua lena, ua e faafofoga soo iai, mafai loa ona foia ou faafitauli.

Le faatuatua e pei ole fatu ole sinapi, ona o tatou mafaia lea o mea tetele.

E manamoia lava le faatonu, le faamalosi mai le taitai. Aua a leai loa se taitai, pule loa le fitafita ia, salalau ma le autau, pei lava ole aulakapi, ua leai se game plan.

Ua na ole kiki lava i luga - ae tuli.

Silafia e Iosua, soo se osofaiga e alu ae lei talanoa ile Atua, -faiaina.

Le taimi la lenei, e lei toe faiaina le taitai o Iosua, o lana masani - ole tuu ile Atua, mafuta ile Atua, taimi uma.

[3] O lona tolu o faafitauli- O le nuu ua faavaivai. Fitu aiga e lei mautu o latou fanua.

Tele eleele ua avanoa, peitai, ua vaaia le faavaivai ole nuu.

Ua le o e faauma le galuega, na mafua ai ona tuua ai Aikupito, ole nuu sa nofo pologa ai. Ai ua fiu foi e tau, lea ua nofonofo ma foliga ua iai le le lava male faavaivai. Lapatai le taitai; Tou te faavaivai seia afea, a faafefea le nuu lea ua foai mai ele Atua o outou tama.

Lailoa le Atua e tau mo le nuu, ao lenei ua le popole ile nuu ole folafolaga, ua fai le loto ole tagata ia. Ose faafitauli tele le foia ole paie, ma le faapalapala, faigata ua malie le fifilemu. E faapea foi se lagona ile saolotoaga, ua uma ona fai ele Atua mo tatou, maea ona faia le togiola mo le agasala, ae foliga e le amanaia, le mamafa ile mamantu ole kerisiano. Ua le faia le galuega na poloai ai Iesu, ia o e talai le tala ole faaolataga.

Lea ua faamalosi Iosua ile nuu;

[1] O muamua lava e vaai le fanua; poo a ituaiga eleele, o iai ni vanu, mauga, vai, gaoa, togavao? Tusitusi uma mai foliga ole fanua. Fua le tele ole fanua, ma vaevae i vaega e fitu.

[2] O le mea lea, tofi ni sui se toatolu mai le aiga, ona o lea e faifaatasi le galuega. Manaonia le sao o faamaumauga o fanua; ia molimau e le toatele, faamatalaga ma le faafanua ole nuu. Faatonuga - a maea ona fua le fanua, ona aumai lea ole faafanua ile taitai, nate faia le faasoa.

[4] Ole faafitauli lona fa ole faasoa:

Ina ia aveese faafitauli e ona tutupu mulimuli, na fai le vili e faasoa ai fanua. Ole faaogaina ole vili, ua aveese ai le faailoga tagata, ma le masalosalo ile faiga ole pule.

Talitonu - ose faasinomaga lea na tuu e le Atua ia Iosua.

Tele ia o faafitauli e tutupu mai i mea nei o fanua, faigata ole talitonuga ole fanua ole tofi mai le Atua. A sii tuaoi le tagata, ole valaau foi lea i faafitauli e omai.

Ole foia faafitauli faapenei i malo temokalasi, ole ofisa o faamasinoga.

Manatua ai le agaga ole tagata lenei o Aperaamo, ile faasoaina o fanua, ina ia tausi le filemu ile aiga. Mamao le silafia e Aperaamo i faafitauli, ona ole sii tuaoi. Ua amata ona misa le au fai lafumanu a Lota - ma le au fai lafumanu a Aperaamo, ona o fanua. Silafia e Aperaamo, le taua ole Ola filemu ole aiga. Lea na valaau ai Aperaamo ia Lota, - male aoaoga - e leaga le femisaai o la au faigaluega ma fanau; ae faapenei,

ia e tagai ile fanua tele lena o loo i ou luma, ae filifili i le taumatau, ona tauagavale lea o au; a taumatau oe, ona agavale lea o au.

Ose faatupu ile filemu -ina a tele naunau.

Na tuu ia Lota, e fili muamua, ole toega o Aperaamo lea. Le agaga matagofie lea ole loto maulalo, ao le agaga foi lea, oloo aoao mai ai Paulo ia ou manatu, ua sili leisi.

Uiga masani, e tuu muamua mai loa le avanoa, e vaai muamua lava le fanua laugatasi mo au. Peitai o ala ole faatuatua, o ala pulea male poto, e faamuamua le isi tagata, maua ai le filemu, ma foia ai faafitauli.

Se isi foi mafaufauga, tatou te vaai i le lamolemole male lafulemu, ona o tatou filifilia lea o lena, ae lilo iai tatou, ai o iai ni auro mani suauu i totonu ole fanua ile gaoa. Tatou le leiloa atu le manuia, seiloga ua o tatou eli i totonu, ma afu sa tatou tautua. Le gata i lea, ia manatua foi, o le nofo i luga ole mauga, e afio ai le Atua, e pei ona talitonu nisi, ma lenei, tatou te mautinoa, e ono faasao mai ai foi tatou mai i galulolo. Lelei ona toe tagai ile fiafia e ola faa fifilemu. Ae maise lava le autalavou. Ole faatuatua e le ose ola e filemu;

ole foia foi o faafitauli, e manaomia le tofo i faigata.



Nt.

Tala ile tamaitai mai lea na saili solo se fofo. Ua sefulu lua tausaga o tigaina i lona gasegase, tele oloa na faaalu ai, ae leai se suiga lelei, na ole atili ai. O faafitauli na ole soifua gasegase ole tamaitai. Faalogologo le tamaitai nei, ao aoao Iesu ile motu o tagata, sa ia manatu ifo ai i lona loto, e pei ona tusia;

Afai oute pai atu, tau lava o ona ofu, ona ou malolo ai lea.

Ose tautinoga o lona faatuatua ile Alii. Ole laasaga lea na oo iai, na ona pai lava ole tamaitai ile ofu o Iesu; upu tusia, Ona utu loa lea o lona puna toto; o lona uiga ole taimi lava na pai ai, lagona male le suiga ole ola - ua faamaloloina lona gasegase. Ole uiga ole tala, ole taua ia, ole taua ia, o lota mautinoa, lota Ioe- e moni - e tupu le mea lea, pea ou faatino; aua ole tino mai lea ole faatuatua.

Na lagona e le Alii le alu ese o le mana mai ia te ia, na afua ai ona fesili le Alii, poo ai lea na pai i lona ofu? Ua matau ma le gatete le tina, ona alu ane lea ma faapau i luma o Iesu.

Ua fetalai atu Iesu, o lou faatuatua, ua e malolo ai. Ole faatuatua e foia ai faafitauli.

Ole taua ole tala lenei, ua faailoa mai le uiga ole faatuatua, ma - o Iesu e tuu iai le faatuatua. O la tatou tautinoga, ua o tatou faatuatua ile Atua le Tama,

ma Iesu Keriso olo tatou Alii, ole alo o le Atua. O la tatou galuega, ole faaolaola olea faatuatua. Ae ola le faatuatua ile taulogologo, le fiafia i mafutaga faale - Atua.

Tasi lea mafuaga o mafutaga, e pei o mafutaga ale autalavou,

mafutaga a taulelea. O mafutaga faapena e ogatotonu ai foi le Alii.


Amene.




Rev Avea Talitonu Saleimoa Samoa.

O loo faaopopo pea mataupu fou , ole mea lea faailoa mai ni mataupu oloo fia silafia tatou te fetufaai ai.

We are conntinually adding new material and new topics. Please check back frequently in regard to obtaining information that is of interest to you.


Revision: 2.1983.00

Date: Sun May 28-05-2006


 




image
image
image
 
image
image